Baloirik gabeko jokua

Saskibaloi partida baten iraupena 40 minutukoa da. Denbora honen erdia, gutxi gora behera, aurkako taldeak izaten du. Beraz, gure taldeak baloia 20 minututan zehar edukiko du partidu batean.

Taldean 8 jokalari bagina eta denok denbora kopuru berdina jokatuko bagenu, jokalari bakoitzak partidu oso batean zehar, baloia bere eskuetan 2,5 minututan bakarrik izango lukeela konturatzen gara.

Horregatik, entrenatzaileok, jokalariei baloirik gabeko jokua irakasten saiatu behar dugu, azken finean, partidu bateko denbora gehiena honetan pasako baitugu. Entrenamendu batetako ariketa gehienak, ordea, baloiarekin jokatzen irakasten digute: sarrerak, tiroa, 1c1, bote ariketak...

Ondorioz, gogoan izan, saskibaloia ez dela baloia eta kanastaren jokua bakarrik, saskibaloia erritmo aldaketen eta espazioen jokua ere ba da!

Gogoaren Indarra

Edozein kiroletan, gogo eta intentsitatearekin jokatzeak izugarrizko garrantzia du, askotan, intentsitate hau jokalari baten gabezia tekniko eta fisikoak ezkutatzera iritsi daitekeelarik. Honen bi adibide garbi, Fernando San Emeterio eta Felipe Reyes dira.

San Emeterio ez da jokalari azkarrena, ez du fisiko onena, ez da jaurtitzaile peto bat, ez da saskiratzaile onena, ez da defendatzaile bat... baina denetik egiten du, eta ondo gainera. Momentu honetan ACB-ko jokalari onenetakoa da dudarik gabe.

Felipe Reyes-en momentu onenak, ordea, pasa direlakoan nago, baina, nire ustez, azken hamar urteotako ACB-ko jokalari onenetakoa izan da. Bere posiziorako nahiko txikia izanik (2.03 m), inoiz izan den erreboteatzailerik onenetakoa dugu.

Zein da bi jokalari hauen sekretua? Ba esan bezala, gogoa, intentsitatea, garra eta kemena. Taktikoki oso ondo mugitzen diren jokalariak dira, momentu bakoitzean non egon eta zer egin behar duten dakiten horietakoak.